Hakha peng Chawncum khua ah thiamtah in paw aa cawm mi inn 80 hrawng an si i thla khat ah nu pakhat nih tangka sing khat in sing hnih kar an hmuh khawh tiah khuami sin in thawng kan theih.
“Kan khua ah thiamtahnak hi Chin cozah nih nikum i hlathlainak cazin a rak tuah lio ah 74 an um i atu ah cun 80 hrawng an si cang lai. Nu pakhat nih thla khat ah sing khat in sing thum kar an hmuh khawh i kan khua hi thiamtah in paw aa cawm mi an tam,” tiah Chawncum khuami Pu Khua Er nih January 30 ah The Hakha Post ah a chim.
An zuarnak kong he pehtlai in, “Gangaw lei nih thiamsin le a la ti bantuk kha hram an hun damhpiak mi hna hi cu Gangaw lei ah an zuar, anmah tein hram aa damh mi cu Hakha lei ah an zuar i mah tein hram aa dirh kho mi cu thla khat ah sing thum tiang an hmuh khawh,” tiah Pu Thawng Er nih a chimchap.
A tak mi hna hna kong he pehtlai in “Mino an tam. Nu kum hra nih cun an thiam dih i tangthum tangli hna zong nih sianginn kai lo caan ah biatak tein an tah ve. Pawcawmnak kong ah kannih khua cu nu nih an kan cawm kan ti khawh,” tiah Pu Khua Er nih a chim.
An hman mi la hi a tamdeuh cu Tuluk la a si. India lei la hi a tha nain a man a fak deuh. Thiamtah hi an pipu chan in an rak thiam mi le an tah mi kha nihin an fale chan ah an pawcawmnak rian ah an hman mi a si. Pipu chan ah cun mah tein la kha an cin, an rial i an rak tah. Atu cu lehtama nih thiamsin an tuah mi in an tah cang i a cheu cu zaan zong ah an tah. Pawcawmnak tlak taktak in hram i dirhnak ca ah Chin ramkulh cozah sin ah S.M.E. in tangka cawinak kan sok nain ‘tangka cawinak amahkhan khawhnak nan ngeih lo ca ah cawih awk nan tha lo’ an kan ti i kan hmu lo,” tiah a cunglei upa nih a chim.
Chawncum khua bantuk in an pawngkam Bungzung, Keizuan, Tilaak hrawng zong hi anmah bantuk in biatak tein pawcawmnak ah hmang in a tak ve mi an si. Atu cu Pu Khua Er hruainak in Min Suu Tamah Bu min in thiamtahnak an tuah i kut in tah mi lawng si lo in hni tiang tah khawhnak seh zong an cawk i an tah mi cu Hakha le Gangaw ah an zuar.
