Kyats 10 Billion dih in kham an timh mi Nawi Dam kong ah Chin zatlang phu le siangngakchia phu 48 nih 2021 January 14 i ca an kuat mi hna cu Chin Ramkulh Cozah lei nih zeihmanh thawngthanh thannak le lehnak an tuah rih lo tiah theih a si.
Hi ca an rak kuat mi chung ah, “Nawi Dam project nih aa timh mi, rian ngeitu lei nih Nawi Dam kham hlan zohfelnak tuah dih cikcek hnu mizapi sin ah chimphuannak ngeihpiak ding le hi Nawi Dam kham mi hi mizapi ca ah thathnemnak maw a tam deuh lai thathnem lonak dah a tam deuh lai,” timi pawl zohfelnak tuah dih i mizapi sin ah chimphuannak ngeihpiak ding in an hal hna.
Ca an kuat mi hna kong he pehtlai in Chin Ramkulh, Hluttaw Speaker Pu Zo Bawi nih, “Thil timi hi a lu le taw theih loin ca tial hi cu ngaihchia ngai a si. Hakha khuathar shopping mall sak ding zong kha cheukhat minung nih an duh lo ca ah a hmun Falam ah an thial. An thial dih hnu ah Khuathar lei mino le upa cheukhat nih kan sakpiak than ko uh tiah an rak kan ti. A si khawh ti lo ca ah a caan um ti lo tiah kan leh hna. Cu a si ca ah, thil timi hi a dong a hram thei loin tuah hi a tha lo ngai mi a si. Hakha ahhin minung tampi kan um te lai. Minung tampi kan si lai tik ah ti hi kan har te hrimhrim lai. Cu a si ca ah, Nawi Dam hi a si khawh chung in kan kham lai. Nawi Dam nih hin thatnak tampi zong a kan chuahpi te lai. Ca an kan kuat mi hi cu zeihmanh lehnak zong kan tuah lo. Aruang cu Sipin Minister zong, keimah zong nih chimhfiannak ti pawl zong kan tuah ko cang,” tiah The Hakha Post ah a chim.
Nawi Dam Project Area chung ahhin lo a tuah mi acre 40 fai a um i hmun a ngei mi hna nih cun Nawi Dam kham ding hi an duh lo. An duh lonak hi Ramkulh Cozah sin zong ah siseh, cun rampi ruahnakpetu Daw Aung San Suu Kyi sin zong ah 2020 August thla chung ahkhan an duh lonak ca an rak kuat bal cang tiah theih a si.
