Hakha Motor PK Yehmu Beny Phai hruainak in June 3 zing, Hakha No.2 High school pawng ah motorcycle luchin chinh a herhnak kong signboard an taar i motorcycle a ra mi kha an dirter hna i luchin chinh a herhnak an cawnpiak hna.
“Lukhuh khuh lo in cycle aa cit mi kha kan dirter hna i ca kan taar bantuk in lukhuh i khuh, naa khuh lo ahcun phung ning in tlaih le dantat khawh pin ah khawnden sual ah tih a nunnak kong zong kan cawnpiak hna,” tiah Hakha Motor PK Ye Oh Myo Min Min nih The Hakha Post ah a chim. “Cun Zarhpini fatin khuami sin ah cawnpiaknak kan tuah. Zeica dah Zarhpini theng ah kan tuah ti ahcun, Zarhpini hi cu lukhuh khuh a hau lo, PK nih an tlai lo ti phun in an ruah ca ah mahtin ruah ding a si lo zia le Zarhpi zong ah i chinh hrimhrim a hauhnak kan cawnpiak hna. Pumh le Pathian biak ni a si ruang ah lukhuh khuh lo ding ti a zeihmanh aa pehtlai lo,” tiah Ye Oh Myo Min Min nih a chimchap.
Hakha ah nai hrawng cu pehtlai in PK nih phung a zul lo mi motorcycle aa cit mi pawl an chek ko hna nain ngai lo in lukhuh lo in aa cit mi hi an tam peng ko rih.
Hihi Chinmi nawl kan ngaihlonak le kan nun a niam ning a langhnak pakhat a si tiah khua upa pakhat nih a chim.
