October 3, 2023
Hakha khuasa minung pathum cu kum saupi thong thlak hna ding in SAC ralhraang biaceih zung nih bia a khiahpiak hna tiah SAC hnuzul Telegram Channel nih October 3 zaan ah an tial.
Kum saupi thong tla ding in SAC nih ningcanglo hramhram in bia a khiahpiak mi hna cu Pi Biak Mawi Sung, Pa Van Biak Ceu le Maung Nge an si tiah theih a si.
CDF pawl tangka bawmhnak a pek hna ti in Pi Biak Mawi Sung cu SAC ralhraang biaceih zung nih phungrelnak 50 (j) in nun chung thong tla ding ah bia an khiahpiak.
Pa Van Biak Ceu cu Thantlang ah a cawlcang mi PDF pawl a inn ah a tlunter hna, hriamnam caw ding in Mizoram, Saiha khua ah a kalpi hna i holh a lehpiak hna, cuhna he pehtlaihnak a ngei ti in SAC ralhraang biaceih zung nih phungrelnak 52 (a) in thong kum sarih thlak ding in bia an khiahpiak.
Hakha University Sianginn kulh chung, Law Department le Physics Department cacawnnak chung ah lut in sianginn thilri voi tampi a fir ti in Maung Nge cu rian hraang he kum 7 thong thlak ding in SAC nih bia a khiahpiak tiah an tial.
SAC nih Martial Law a thanhnak West-Northern Military Command chung ah ralhraang biaceihnak nih rammi 271 cu ningcanglo hramhram in thong a thlak cang hna ti zong SAC hnuzul Telegram channel ah hmuh khawh a si.
