Hakha Market cu an hman mi thetse a that lo ruang ah thehter than an si i cu a sa thantu ding ah Chin Ramkulh Sakremhnak Zung nih tuanvo laak ding in an nawl hna tiah April 10 ah thawng kan theih.
“Hi market hi tha seh law saupi hmang kho u sih ti kan duh ca ah tuanvo a laa kho ding mi kan kawl cuahmah. Sakre
mhnak Zung nih tuanvo laakpiak ding in kan nawl hna i a tlamtlin cun sak thawk than colh a si lai. A tlamtlin lo ahcun Chin Ramkulh Cozah nih an tuaktan than te lai,” tiah Chin Ramkulh Sipin Lutlai Pu Thla Hre nih The Hakha Post ah a chim.
Hakha Market cu Design Excel Company nih rak sak mi a si i tangka sing 9000 dih in sak timh mi a si. Chin Ramkulh Hluttaw Kongkau Ruatkhaangtu Committee nih chekhlatnak an tuah i an hman mi thetse le thilri a that lo ca ah an thehter than hna.
Hi kong he pehtlai in Hakha market thil zuartu pakhat zong nih, “Atu tiang an tuah rih lo mi cu thilzuartu ca ah a har ngai. Hmunhma an kan pek chungnak nih le khuachung he aa hlat tuk fawn i thil zong kan manh ti lo. A rannak in kan tuahpiak hna sehlaw kan duh ko,” tiah a chim ve.
Hakha market hi March thlachung ah lim ding in rak timh mi a si nain riantuantu nih an tuan mi a that lo ruang ah theh a si i tutiang ah foundation hmanh an thla kho rih lo.
