Yaw Defense Force (YDF) nih Gangaw peng ah an hren mi hna Hakha lei thilphortu mawtaw pawl cu nihin July 15 ah kalnak nawl an pek cang hna, tiah theih a si.
Hakha ah a um mi chawletthaltu pakhat nih, “Gangaw peng ah aa hreng mi kan thilphortu mawtaw pawl nihin ah Hakha lei ah an rak i thawh cang,” tiah a chim.
Aluancia July 7 ah khan Matupi peng Zawngnak khua ah CNA nih YDF ralkap pahnih an rak tlaih hna caah July 8 thawk in Gangaw-Hakha lam cu YDF nih an rak phih.
Hi kong he pehtlai in CNF/CNA chimnak nawlngei Salai Htet Ni nih, “An hruaitu hna he tonnak kan ngeih hnu ah kan thlah ṭhan cang hna,” tiah media ah a chim.
CNA nih an tlaih mi hna YDF ralkap pahnih Ko Ok Thein le Ko Aung Thet Khine cu July 12 ah CNA nih an thlah ṭhan hna.
YDF lei ṭuanvo ngeitu pakhat nih, “Kan ralkap pahnih cu nihin ah an luat cang i pehtlaihnak zong kan ngei kho cang,” tiah July 12 ah a fehter.
CNA nih an tlaih mi hna YDF ralkap pahnih an thlah hna hnu ah Gangaw in Hakha lei ah a kal ding in thilphortu mawtaw pawl zong kalnak nawl an pek ṭhan hna hi a si.
