Hakha pawng le Timit kiangkap ah SAC ralkap sakhan pathum cu Chinland Cozah ralkap nih nihin November 30 ah an laak than i, Hakha le Tita kar ah SAC ralkap sakhan pali an laak cang tiah theih a si.
“Kiamtlang, Umpu Puaknak tlang le Nawnthlawk bo i a um mi Ralhrang Sakhan kan laak. Timit lei ah cun Keivang Zuan lawng a taang” tiah CDF hruaitu pakhat nih The Hakha Post ah a chim.
Hakha-Thantlang lam, Ruavazung (Kiamtlang), Timit hlei pawng Nawnthlawk bo le Umpu Puaknak tlang SAC ralkap sakhan pathum cu Chinland Cozah ralkap phu komh nih nihin ah an laak i, Hakha le Thantlang kar i a biapi ngai mi SAC ralkap hmunkhuarnak Point 3 sakhan zong 2024 November 25 ah an rak laak.
“Kahdohnak hi a faak ngaingai. Kanmah lei zong biatak tein kan i tim i Pathian thawng in a tling. Tu chun kahdohnak ah SAC ralkap a nung in kan tlaih mi an tam. Hriamnam kan laak mi dihlak zun 60 leng a si. Kahdohnak a dai rih lo” tiah raalram thawnghram nih The Hakha Post ah a chim.
SAC ralkap 50 hrawng nih an hngah mi Kiamtlang sakhan laak kahdohnak ah Chinland Cozah ralkap nih SAC ralkap tampi an tlaih hna, hriamnam zun 40 le kuanzen tampi an laak tiah kan theih.
“Battalion Commander tel in ralkap officer pahnih, Palek Major rank pakhat an thi. SAC ralkap 12 nih hriam an chiah i a sung an pek, 19 a nung in kan tlaih hna, Sakhan chung ah ruak 11 kan hmuh. A taang mi tlawmpa an kong tu cu kan chim kho rih lo,” tiah CNF/CNA in Salai Htet Ni nih Chinland Channel ah a chim.
Timit lei kahdohnak ah RPG, 60MM hriamngan le meithal zun 12 an laakchap i SAC lei palek officer tel in ruak pali hmuh an si tiah kan theih.
Kahdohnak ah SAC nih vanlawng in bomb pehtlai in a thlak hna i kahdohnak a faak ngaingai tiah kan theih.
Hakha Thantlang kar SAC ralkap sakhan pawl cu November 22 in Chinland Cozah ralkap nih kah hram an thawk than. SAC nih Hakha khua chung in ralkap bawmtu ni fatin ti awk in an thlah hna lawng siloin cunglei zong in zenkuan a chap peng hna tiah theih a si.
