Hakha le Paletwa kar motor lam a rauhhlan ah a pem cang lai
=========================================
Chin Ramkulh Cozah nih Chinram khua kip motor lam pemh ding in a tuah cuahmah lio a si i a rauhhlan ah Hakha le Paletwa kar motor lam a pem cang lai, tiah Chin Ramkulh Lamsuul lei Minister Pu Sui Thio nih Chin Cozah le Mizapi tonnak hmun ah a chim.
Chin Ramkulh Lamsuul lei Minister Pu Sui Thio nih, “Paletwa in Cikha kar hi meng 509 a si i Thaal, Khuasik, Fuur caan hman khawh ding in kan timh i zatuak 75 kan lim cang. Hakha in Paletwa hi meng 307 a si i Hakha in Cikha hi meng 200 a si. Hakha in meng 307 aa hlatnak Paletwa cu caan tlammpal ah motor in ni khat ah phanh khawh a si cang lai i khualtlawng motor zong kan timh,” tiah a chim.
Chin Ramkulh Cozah nih Chinram lamsuul a tuan lio mi kong cu Minister Pu Sui Thio nih, “Paletwa in India ram Zorinpui tiang hi meng 68 a si i pe 24 a kau mi nylon kattaya phah timh a si. Cu he pehtlai in Kaladan hlei pe 1944 a sau mi dawnh nakding ah tangka billion 25 hman timh a si i zatuak 50 lim a si cang. Cun, Tawungkhanran lam hi meng 60 a si i meng 16 hrawng lawng tuah ding a taang cang. Kanpetlet in Sami tiang hi meng 146 a si i tawlrel lio mi a si ve,” tiah a fianter.
Chinram lam le suul kong ah CBCUSA GS Rev. Dr. Thlaawr Bawihrin nih, “Ka hawipa nih, ‘Vawlei cung ah a tlawm bik mi zeidah a si’ tiah bia a ka hal i kei nih, ‘Chungkuh’ tiah ka leh. Ka hawipa nih, ‘Na palh. Vawlei cung ah a tlawm bik cu Chinram kattaya lam a si’ tiah a ka leh. Khua ka ruat, ka ngakchiat lio tein Khaikam lam khi kattaya aa phah cang nain nihin tiang Hakha a phan kho rih lo. Chungkuh pakhat khi Khaikam in ratter usih law nihin ah cun Hakha cu a phan cang lai. Cu tluk cun kan thangcho lo. Khuaruah kan herh,” tiah a chim.
Chin Ramkulh Cozah nih khuachung lam a kauh mi kong ah Minister Pu Sui Thio nih, “Falam khua i Chin Miphun Ni tuah lio ah khuachung lam a bi tuk tiin tangka nuai 1500 dih in lam kan siamremh i hlan nakin aa relrem deuh ngaingai. Mindat khuachung lam zong kauh lio a si. Hakha khuachung lam a bit deuhnak le khawnden a tam deuhnak pawl zong kan kauh. Hakha khuachung innkar lam ti bantuk zong kan remh i atu hi Hakha Sii-inn lam hi papek in tuan lio a si,” tiah a chim.
The Hakha Post
