Hakha le Kalaymyo kar nylon kattaza phah ding World Bank nih a hnatlakpi cang

World Bank nih Hakha le Kalaymyo karlak motor lam nylon kattya phahpiak ding timh mi World Bank lei in relrem lonak ruang ah let timh a rak si na in Chin Ramkulh Cozah he ton hnu ah bawmh than ding hnatlaknak ngeih a si cang, tiah April 10, Chin Ramkulh Lamsuul lei Minister Zung in thawng kan theih.
“2015 kum Hakha vawlei mincimh ruang ah World Bank in bawmhnak a ra i Hakha le Kalaymyo kar motor lam remhpiak ding hi bawmh timh a rak si. Asinain, vawlei mincimh nih a rak hrawhchih mi liampiak ding a tam deuh i maw a si hnga bawmh ding mi let rak timh a si. Chin Ramkulh Cozah nih biatak tein a ceihmaipi than, bia a ruah than hi Hakha le Kalaymyo kar lam nylon kattya phah ding hnatlak than a si cang,” tiah Chin Ramkulh Lamsuul lei Minister Pu Sui Thio nih The Hakha Post ah a chim.
World Bank nih Rakhine Ramkulh, Sagaing Ramthen le Chin Ramkulh bawmhnak ca ah US dollar nuai 205 budget a thlak. Cu chung ah Chin Ramkulh ca ah 66.8 billion hman a si lai i Hakha le Kalaymyo kar lam remhnak ca ah hman a si lai, tiah kan theih.
Hi Hakha le Kalaymyo kar lam remh ding mi kong ah chambaunak le sunghnak a um nakhnga lo Chinram CSOs hna zong i teltum ve ding in World Bank he hnatlaknak an ngei cang.
“Lam remh ding hnatlaknak ngeih a si cang bantuk in lam le suul zohfelnak tuah a herh. Lam cheukhat cu nylon phah awk a that lonak a um lai i concrete in tuah ding mi a um lai. Cun, thilri a herh mi an damh khan lai lam vialte felfai tein an zoh dih hnu 2019 October thla ah rian thawk ding in timhlamh a si. Hi lam remhnak ah Chinram CSOs hna zong World Bank nih teltum ve ding a pek ko hna cun Chin Ramkulh Cozah lei cun innka honpiak an si ko,” tiah Pu Sui Thio nih a chimchap.
World Bank nih Hakha le Kalaymyo kar lam bawmh ding leet a timh lio ah Chinram Tedim, Falam, Thantlang, Hakha le Kalaymyo in minung 14725 nih lam remhpiak ding bawmh halnak mithut hnu ah atu bantuk in bawmh ding hnatlaknak ngeih than a si hi a si.