Hakha khuapi kiangkap ah SAC ralkap nih landmine an chiah dih caah luhchuah rih lo ding in Hakha City Council nih nizaan January 18 ah thawngthanhnak an tuah.
“Ralhrang nih Hakha khuapi kiangkap hmun tampi ah ke lamh mi bomb an chiah dih caah Hakha khuapi chung um mizapi nih khua kiangkap ah luhchuah le nuamhnak tuah in tlunkal rih lo ding le Dohthlen lio caan a si bantuk in Hakha Kiangkap cu ralram a si caah Janaury 18, 2024 ni thok in cathanh chuah ṭhan hlan tiang mizeihmanh Tiva kal, Ngahring dawi, Sarap chiah, Ramveih le Ramriah lo ding in thawng kan in thanh hna,” tiah Hakha City Council nih thawngthanhnak an tuah.
Nawl a zul lo mi poh cu phungning in dantat le zarh khat nak tam lo thongthlak khawh a si lai, tiah an langhter chap.
Myanmar ram dohthlennak aa thawk hnu in Hakha khuapi kiangkap ah landmine nih Hakha khuami zeimawzat a puah hnawh cang hna.
Atu thla January 6 zong ah khan Hakha View Point (2) pawng ah kum 18 tlangval pakhat landmine nih a puah hnawh caah a ke khatlei a bul, tiah CHRO nih a langhter.
