Chin ramkulh pengkomh (District) fimthiamnak zung saknak ca ah Nawi Lam thlan (Khuathar) thlan 17 an hlai tiah kan theih.
Hi kong he pehtlai in khuathar Khuanu khuapa lei in Pu Thang Hlun nih, “Kum 72nak Chin Miphun Ni hlan deuh te ahkhan khua mi sin ah thawngthanhnak zeihmanhh um loin pengkomh fiamcawnnak zung lei rian ngeitu upa hna nih Cozah sin ah an sok i an chunh. Thawngthanhnak zeihmanh a um lo ca ah kanmah nih kan va fuh hna. A voi 1nak kan va fuh hna lio ah kan i rem kho lo. Sipin le cozah lei ah thawng kan thanh i nawl an kan pek dih hnu ah atu bantuk in kan tuah mi a si tiah an kan leh. Kan i rem khawh lo ca ah kanmah lei in biaceih bawi hlan i taza cuai kan timh hna. Asinain sang bawi pa nih taza i cuai tiang cu a si kho lai lo, keimah tu nih ka ton hna lai an kan ti. Cun, kan sang bawi nih a ton dih hna hnu ah thlan i thialkamnak ding ca ah tangka fang in siseh, a herh bau mi dihlak an mah cozah lei nih tawlrel piak dih ding in thawng an kan thanh. Thawng an kan thanh dih hnu ah upa cheukhat kan i tong i kanmah lei kap in lehrul lo ding in bia kan khiah,” tiah The Hakha Post ah a chim.
An hlai mi thlan thialnak ding ca ah Na sing 16 man pakhat, Vok thau sing 5 le cheu man pakhat le facang tun 6 cozah nih a pek cang hna i 2020 March 2 ni ah Rual Uu thlan hmun thlang Khuathar thlan hmun timi ah an thial.
Cun, “Atu an cawhnak hmun hi B.E.H.S No.2 sianginn kulh chung ah aa tel mi a si. Hi ka zawn hmun cawh ding le hlainak ding ca ah sianginn rian ngei upa le sang upa hna sin ah rak hal i khua mi sin ah thawngthanhnak zeihmanh um loin an cawh. Anmah nih an chim ning ahcun khuabawi sin ah thawng kan rak thanh ko an ti nain kan khuabawi sin ah kan hal tik ah khuabawi nih zeihmanh ka hngal lo tiah an kan ti. A thlan in thlan 17 an hrawh cang,” tiah Khuathar Mino Vice President 2 Salai Van Lal Cross Thang nih The Hakha Post ah a chim.
