Hakha khuathar nam sawhnak kong ah a sawhtu pa kan tlai kho rih lo tiah Hakha Sakhaanhmu sin in August 10 ah kan theih.
Hakha Sakhaanhmu Myo Win Hlaing nih, “Lunghrinh in kan tlaih mi pa zong kan thlah cang. A ruang cu a cunglei nih an tuah zong ah a mui a fiang kho lo. Cun an i velh le a kal a rang tuk ca ah le Mask aa huh ruang ah a si. Amah a si ko ti mi tette a um lo ca ah kan thlah cang. Cun a thattu pa hi kawl a si taktak ahcun ramchung ah a um ti lai lo, a tli diam cang lai an i velh zaan in, tiah ka ruah. Mask aa huh leng ah thil a can ning a rang tuk, cu ruang ah a fiang kho lo,” tiah The Hakha Post ah a chim.
“A sawhnak namte zong DNA chek ding in kan kuat ko nain a fiang kho lo. A sawh tlawmpal ah hin kan chawn hna sehlaw cu DNA chek khawh a si hnga. An i sawh a thaizing lawng ah an kan thanh. Cun a sawhnak nam zong hi an rak char cang tikah a sawhtu pa DNA a fiang kho ti lo. Kan hlathlai cuahmah lio a si rih ko,” tiah Sakhaanhmu nih a chimchap.
