2020 November 23 suimilaam 8:00PM fai, Hakha khuathar i a cang mi motor le motorcycle accident ruang ah a zaam mi Matupi pa cu Hakhathar mino le khuathar mino i bawm in a zaan ah an tlaih khawh colh tiah theih a si.
Atu bantuk in thil a cang mi kong he pehtlai in Hakha khuathar mino Vice President Salai Van Lal Cross Thang nih, “Motor a mawngh mi hi Palek le PK sin ah phungki motor bantuk in a chim. A pahtu pa cu kanmah Chinmi a si ve ko. Cun, a pahmi pa zong hi a pahnak ruang ah fak ngai in hliam a tuar i, Hakha sii-inn ah an kalpi colh ve. Palek le PK nih zeitindah an tawlrel lai bia an khiahpiak lai ti cu kan hngal kho ve lo. A zaam le cangka in an rak kan chawnh i, Hakhathar mino le Chuncung mino hna sin ah pehtlaihnak kan tuah colh. Hakhathar mino nih rianrang in an rak tawlrel ve i atu bantuk in kan tlaih khawh thannak hi a si,” tiah The Hakha Post ah a chim.
Atu bantuk in thil a cannak hi Hakha khuathar, Thantlang lampial phak lai ah a si. Motor in a pahtu pa hi thlanglei Laitlang Matupi khuami kum 26 upa a si.
An tlaih khawh thannak kong he pehtlai in Hakhathar mino Chairman Pa Hniang Bik Hu nih, “Hakha khuathar mino lei nih thawng an vun kan thanh. An kan thanh le cangka in kan chuak colh i, Hakhathar Check gate kan hal hna. Check gate nih motor pakhat cu a lan, workshop ah ka kal lai a ti. Kan va zoh tik ah a hramthok ahcun kan thei kho lo. A lan cang la maw a si hnga tiah Hakha Education College tiang ka va kal i motor mitceu pakhat hmanh a um lo. Ka kir than i, workshop ah motor a dirmi cu kan hmuh. A hramthok ahcun workshop lei nih an phehpiak. Caan rau lo te ah khuathar mino 40 hrawng an ra. Motor kan zoh tik ah a thlalang a kuai, cun a pahnak ah a motor tlawmpal a rawk mi a um i cu ticun kan theih khawh mi a si,” tiah The Hakha Post ah a chim.
Atu motor in pah a tongmi pa hi kum 27 hrawng upa a si i, a motorcycle tu cu a rawk dih tiah kan theih.
