Hakha Khuanu Khuapa nih 2020 chung ah tuanchuah ding thil biapi phun 7 meeting ah biachah
Hakha Khuanu Khuapa nih 2020 kum chung ah thil biapi phun 7 tuanchuah ding January 18 meeting ah an fehter, tiah kan theih.
Cu thil biapi an chuahpi mi cu; 1). Hakha khualak ah workshop a tuah mi hna le an motor siseh, motorcycle chiah ning pawl hi felfai deuh in Sipin nih an zohfel nakhnga bia an chah. 2). Zu hi kan khap kho lai lo nain zu chia pohpoh hi Khuanu Khuapa, Palek le Khuabawi i bawm in kham ding. 3). Market, dawr, le sianginn tibantuk ah eidin zuar mi nithla luan le luanlo zohfel than ding. 4). Ral Hmung certual Shopping Mall hi Khuhsilobo ah aa relrem deuh hnga maw, tibantuk, 5). Thaal a chuah cang lai bantuk in Timit dinti hi khuachung a phan cang i cucu inn kip ah phawtzamh khawh zokzok nakding, 6). Dawrthar Sang thum ah then ding, le 7). Riitkuang tlang ah vanlawngbual tuah ding, tibantuk thil biapi phun 7 an ceihmai tiah kan theih.
“Timit dinti hi Hakha khuachung a phan cang ko nain nihin tiang inn kip ah phawtzamh khawh a si rih lo mi hi rianrang tein phawtzamh khawh ding kan i tim. Timit dinti kan i zaat lo ahcun Laiva zong kan ruah than te hnga. Zu chia hrimhrim hi cu minung tampi an thi cang i kan doh hrimhrim a herh. Cun, eidin zong hi ralrin taktak a herh. Workshop hrimhrim hi khualak ah a um mi hi thial hrimhrim a hau fawn i hihi Sipin nih tuanvo an lak deuh hna awk a si,” tiah Hakha Khuanu Khuapa Assistant Secretary Pu Ral Kham nih The Hakha Post ah a chim.
Hi thil biapi phun 7 hi Hakha Khuanu Khuapa nih 2020 kum chung ah rianrang deuh le papek deuh in tuanchuah ding ah aa hmaithlak mi a si, tiah kan theih. (By: KB)
