Hakha in Kawl lei ah nifatin a chuak mi bus pawl an chuahnak Hakha car gate cu June 3 zing an chuah hlan ah Ramkulh Kuatphurhnak lei Zung Osihmu U Saw Naung, Tlawnkainak lei Zung Hngunkyiazihmu U Hla Htun le Motor PK lei in Yehmu Benny Phai tiin cheknak an ngei.
“Kan cheknak a ruang cu nifatin khualtlawng motor pawl le aa cit mi khualtlawng an him khawh nakding ralrinnak ca ah a si. Motor khaaltu taisawm i sawmh ding, cun meithahnak dur an i ken maw, cun motor pakhat khat a can sual tik ah aa cit mi an chuah khawh nakding ah motor thlalang khuainak thir kuthruk an i chiah maw, cun mitkuh bu in an khalh lo nakding le zurit bu in an khalh lo nakding pawl kha kan chek hna,” tiah PK Ye Oh Myo Min Min nih The Hakha Post ah a chim.
Khualtlawng motor pawl nih poipang an ton lo nakding le khualtlawng pawl zong harnak an ton sual lo nakhnga hi bantuk hi tuanvo ngeitu nih an chek tawn ca ah motor khaaltu le gate tuanvo ngeitu pawl nih ralrin a herh ngaingai. ###
