Hakha khuahlun hi Red Zone (a sen mi hmunhma) a si rih ca ah minung um khawh a si rih lo, dumhau tuah cu a ngah ko, inn sak in um a ngah lo, tiah Minister Pu Soe Htet nih a chim.
2015 kum Hakha lei minh ruang ah Hakhathar ah thial mi hna chung inn Hakha khuahlun ah a um mi inn 47 le Hakhathar buaibainak kong ah Chin Media le Chin Ramkulh Cozah tonbiaruahnak hmun ah Sipin le Electric Minister Pu Soe Htet nih fianternak a tuah. “2015 kum Hakha vawlei a minh a fah tuk tik ah, ahohmanh an rak um ngam lo. Cu tik ah, Hakhathar No.1,2 ah thial an si. Inn 700,800 thial an si tiah ka ruah. A tang mi inn 47 cu zeihmanh kan i lak lai lo. Tihin kan um ko lai an ti. Aa thial mi hna tu cu, inn khat cio sakpiak an si. A duh lo mi zong tangka in pek an si. 2020 ahcun, kannih Chinmi rengreng hi mah le hmunhma thing a tlaihchan mi kan si. Hakha khuahlun cu cinthlaknak zong ah a tha. Cu tik ah thlaikheo zong an cin than i, caan sau an cin tik ah, inn an remh than i umbeh an duh. A cheukhat cu an um than. Hi ti an um than tik ah, hmunthar ah le inn zong an ngei cang. Lam, ti le mei zong tuahpiak dih cia an si fawn i an covo aa tluk ti hna lo. Hmun thing te ah um than kan duh an ti i, a hlan 47 dah ti lo cu, kan cohlang hna lo. Um than taktak an duh ko ahcun thlaikheo cin cu a ngah ko. Hakhathar ah nan um duhlo a si ahcun, Pengkomh ah nan ap lai kan ti hna i ahohmanh nih an ap fawn lo. Vawlei zong a vun feh deuh tik ah, inn zong an remh cio hna i atu hi a tam tuk cang. Cu tik ah hmun aa cuh mi kan lo. Atu zong Cozah biatak tein bia kan i ruah lio ko,” tiah Minister Pu Soe Htet nih a chim.
“Hakha khuahlun cu Hakha khua hramthok zong a si i, kum 600 leng a rau cang mi a si, tiah tuanbia zong ah a um. Asinain, Red Zone (a sen mi hmun, hmun him lo) in hrawh a si rih lo. Keimah zong ca ka chiah, CM zong nih a chiah i, voi 2 voi 3 Cabinet ah kan ceih cang. A hnu bik kan biachahnak cu, thlaikheo cin cu a ngah ko. Inn le thlam sak cu a ngah lo. Thlam zong ah a di lawng cih ding, a vam chon lo ding, ni linh le ruah sur ah i dornak tha ding lawng in tuah ding tiah kan ti. Asinain, atu an ti mi cu, Hakhathar cu kan fale sianginn kainak ah a hlat tuk, sii-inn kalnak a hlat tuk an ti. Atu a taang mi hna he bia i elnak zong a um. Asinain, mifimthiam hna nih, red zone a si lo, a him mi hmun a si cang an ti ahcun kan pek than ko hna lai. Atu zong, Pyidaungsu Cozah sin ah ca kan kuat i, vawlei lei zohfeltu mifimthiam zong bawmh kan hal hna, zarh 3 hrawng a si cang. An zoh lai i a him ko an ti ahcun kan pek than ko hna lai, kanmah minung pei an si ko cu, a him rih lo an ti belte ahcun pek khawh an si rih lai lo. A ruang cu, a him rih lo an ti bu in kan pek hna ahcun, a hlan bantuk in vun cang than sehlaw zeitindah kan tawlrel khawh than hna lai. Atu kum thla khat chung hmanh ah li voi 5 hrawng aa hnin. Mah lo zong ah a hlan tein vawlei minh a rak um pah tawnnak hmun a si fawn. Ruahpi biatak tein sur than sehlaw a cim than kho mi dirhmun a si. Cucaah, mifimthiam nih an zohfel hlan cu kan hngak ko u. Hmunhim a si ko an ti hnu zong ah, Hakhathar hmun he hi ka he cun an i lak lai lo, pakhat an i lak ahcun pakhat cu an sung ko lai,” tiah a chimchap
