Hakha khuacuanhbo ah sak cuahmah mi tower cung in Buanlung khuami Pu Kap Lian Thang (Kum 40) cu April 16 ah a tla.
Hi a tlaknak hi a cung ah khuacuanhbo a hngaktu pa he zuu an ding i an rit cang ca ah a hawipa Pa Hu nih a tlaih khawh lo ca ah an pahnih in an tla. Hakha sii-inn an phan colh i siibawite nih a tha ko lai an ti hna.
Pu Kap Lian Thang hi Hakha Peng Buanlung khuami Pu Ngun Nawl fapa a si i Hakha Cawbuk Sang ah a um mi a si.
“Hi an tlak hi zu an rit ruang ah a si. A hngaktu pa zong nih zudin cu a sianh hna ding a si lo nain ahngaktu hman nih a din ve ca ah tubantuk in an mualphonak a si. Hi sak mi a dih hlan cu an kaiter hna lo ah a tha. Hi an kaiter lengmang hna ahcun hi lawng si lo in an tla than ko lai,” tiah Hakha sii-inn ah Palek nih tuanvo pek mi Pu Amos nih The Hakha Post ah a chim.
Hakha khuacuanhbo i sak cuahmah mi tower hi pee 32 a sang mi a si i pee 16 kau in an sak mi a si. Chin Ramkulh Sipin nih tuanvo laak in budget sing in sak cuahmah mi a si.
