Hakha khuachung ah vawlei le hmun kong ah nihin tiang buainak a um peng mi kong he pehtlai in Chin Ramkulh Cozah Lamsuul le Pehtlaihnak Minister Pu Sui Thio nih The Hakha Post in ralrin peknak bia March 17 ah a chim.
“Hakha khuachung ah nihin tiang kan ton mi vawlei hmun kong hi mizapi nih kan i ralrin a herh. Pengkomh (Khayaing) le Vawlei Tahnak Zung tuanvo ngeitu sin ah tangka pek riangmang in vawlei le hmun ngeih i tim hlah u. Anmah nawl in an in pek mi hna cu phungluutlo a si ca ah dantat thiamthiam a si lai. Ramkulh Cozah nawl loin peknak nawl an ngei lo. Ramkulh Cozah nih a si khawh chung in kan tawlrel cuahmah ko. Atu hi Sangthar dang inn 100 tlum samh ding zong kan ngei rih.
Mah duhnak zawn va virhkhoih i Pengkomh le Vawlei Tahnak Zung ah tangka va pek in hmun ngeih i tim hlah u. Cun, Sang Khuabawi nih hmun peknak nawl hrimhrim a ngei lo i Sang dangdang Khuabawi zong nih pek lo ding. Mizapi hrimhrim nih Pengkomh, Vawlei Tahnak Zung le Sang Khuabawi sin ah tangka pek in hmun va halh ti hlah u,” tiah ralrin peknak bia The Hakha Post ah a chim.
Hakha khua ah vawlei kong nihin tiang a buai. Hakha Khuathar Khuabawi an report mi zong kan hlathlai lio i Pengkomh Zung tuanvo ngeitu nih hmun 86 a pek mi hna zong kan hlat lio. Sangthar samh mi zong drone he zohfel a si cang i a hmunhma zohfel lio le innkar lam pawl tah cuahmah a si. Caan raulote ah phawtzamh khawh ding in kan timhtuah, tiah a cunglei Minister nih a chim fawn.
HakhNet TV Thawngchimnak zoh khawh a si.
