Hakha khuachung, Pyidawtha le Khuathar sang chung ah, zawtnak theih rih loin vok pali an thi cang tiah Chin Ramkulh, saram siibawi lutlai Dr. Kyaw Thu sin in thawng kan theih.
“Chin Ramkulh, Hakha khuachung ah vok a thi mi an um ti hi cu kanmah lei zong nih thawng kan theih. Thawng kan theih le cangka in Peng chung saram sii-bawi rian a ngeitu hna sin ah thawng kan thanh colh hna. Thawng kan thanh hna i, vok a thihnak hmun le sang ah anmah pumpak in an kal i, zohfelnak le chimhcawnpiaknak an tuah colh. Atu Hakha i vok a thi mi hna hi zei zawtnak indah an thih ti kan thei rih lo. Nan vok an dam lo a si cun kan sin ah thawng rak kan thanh hram uh,” tiah Dr. Kyaw Thu nih The Hakha Post ah a chim.
Atu Hakha i vok a thi mi hna hi an thih lai ah thaw chuah an i harh i, an takcung hmul zong tisa toih mi bantukin a tlong tiah vok zua hna sin in kan theih. Mipi sin in thawng kan theih ning ah, Hakha khuachung ah vok a thi mi hi vok 15 hrawng a si cang tiah theih a si.
Chin Ramkulh chung inn zuat satil kong he pehtlai in saram zohkhenhnak lei rian ngeitu hna nih khuate ah siseh, khuapi ah siseh chimh cawnpiaknak le zohfelnak zong an tuah tiah theih a si.
Cun, Dr. Kyaw Thu nih, “Peng chung rian ngei hna nih kan sin in thawng an rak thanh ning ahcun Pyidawthar sang ah vok hnih, Khuathar sang ah vok hnih, dihlak fonh vok 4 an si. Atu a thi mi hna zong hi zei zawtnak indah an thih ti kherhhlainak kan tuah rih lo. Tuah cu, tuah ding hrimhrim a si ko. Mizapi lei zong nih biatak tein kan i ralrin a herh ngaingai. Daithlan awk zong a tha lo, cun, tihphan tuk ding zong a si lo,” tiah The Hakha Post a a chimchap.
Chin Ramkulh chung ah vok zawtnak aa thok hmasa cemnak hi Thantlang in a si i, 2020 March thla chung hrawng in aa thok. .
Myanmar ram chung ah Africa vok zawtnak hi 2019 in aa thok. 2019 ah Myanmar ram chung hmun 4 le 2020 ah hmun 6 ah vok zawtnak a tlung tiah theih a si.
