Hakha khuachungah rawldawr pakhak cu cozah lei nih dawr chungah thut khawhnak nawl an pek hnu ah Ngandamnak le Zaanglek zung nih COVID-19 i runvennak caah zulh phung ser mi zulh lo ruangah tuanvo ngeitu hna nih dan an tat mi dawr khat a um cang tiah theih a si.
Hi kong he pehtlai in Hakha Sipin zung riantuan mi pakhat nih, “Ngandamnak le zaanglek zung nih zulh phung a ser ning tein dawr hunnak nawl an pek hna hnu ah zulh phung tha tein an zulh lo ahcun zulh phung ning tein tangka sing 5 dantat an si. Hi dawr hi tuanvo ngeitu hna nih an chek lio hna ah dawrchung riantuan mi pawl hi mask an i huh lo caah kan tlaih hna hi a si. Dawr ngeitu nih hin anmah tein Sipin zung ah chalan an lak i bank ah kyats sing 5 an tun” tiah The Hakha Post ah a chim.
Hakha khuachungah parcel system si loin, dawr chungah thut khawh ding in nawl an pek hna hi 2020 December thla in a si, honter an si mi zong hi Ngandamnak le Zaanglek zung nih COVID-19 i runvennak caah zulh phung ser mi ning tein a zul kho ding mi lawng honter an rak si tiah theih a si.
