COVID-19 zawtnak runvenak ca ah tiin caan zei mawzat chung dawr chung ah thutter loin, parcel system in an zuarter mi hna cu, a rauh hlan ah dawr honter in a chung ah thut khawhnak nawl an pek cang hna lai tiah thawng kan theih.
Hakha khuachung rawl dawr le eidin dawr a dangdang hna zong hi COVID-19 a nawl khatnak lio zong ah parcel system in an rak zuarter hna mi cu zawtnak a daih deuh ca ah dawr chung ah thut khawhnak nawl an pek hna. Cun, COVID-19 a nawl hnihnak nih a vun kan phak i, ralrinnak ca ah tiin parcel system in an zuater than hna tiah theih a si.
Hi kong he pehtlai in, Hakha Peng, Sipin Zung riantuan pakhat nih, “Hakha khuachung rawl dawr le eidin dawr dihlak COVID-19 runvennak ca ah tiin parcel system in zuarter an si. Hi bantuk in zuarter an si chung ah, nifatin an tangka lut a hnursuan ngaingai. Cu lawng si loin a hlan bantuk in an manh ti lo i dawr ngei pawl harnak an tong. Atu hi, Cozah lei nawl peknak in a rauh hlan ah honter in a chung ah minung thutter khawh an si cang lai. Cheukhat dawr cu COVID-19 runvennak ca ah a herh mi thilri pawl zong aa zalh mi an um cang,” tiah The Hakha Post ah a chim.
Parcel system si loin, dawr chung ah thutter an si cang lai nain, Ngandamnak le Zaanglek Zung nih COVID-19 runvennak ca ah zulhphung a ser mi tlamtling tein an zulh a herh. Cun, “Dawr an hon i, a chung i mi an thut tik zong ah Ngandamnak le Zaanglek Zung nih a chuah mi zulhphung an zulh le zulh lo zohfel ding hi Cozah zung 7 i bawm in tuanvo an laak lai,” tiah a cunglei Sipin riantuantu pakhat nih a chimchap.
Dawr pawl an hon hlan ah, dawr ngeitu dihlak auh in 2020 November 27 City Hall ah COVID-19 kong he pehtlai in chimh cawnpiaknak le fianternak zong an tuah lai. Hakha khuachung ah hin rawl dawr hi 116 a um tiah theih a si.
