Hakha khuapi sang 8 chung ah Cozah lei nih dinti pek mi dihlak zatuak in 65% lawng a si tiah Hakha Peng Sipin Lutlai Pu Tam Aung Shing sin in thawng kan theih.
Hakha khuapi chung um milu dihlak 30265 a si i, ni khat ah suimilaam 8 chung rian ngeitu hna lei nih ti pek a si. Dinti hi ni khat minung pakhat nih 15 gallon hman a si tiah Pu Tam Aung Shing nih 2020 December 8 i an tuahmi Hakha dinti kong Khuanu Khuapa hna he ton biaruahnak an tuahnak hmun ah a chim.
Pu Tam Aung Shing nih, “Hakha khuapi chung dinti hi ni khat suimilaam 8 pek a si. Timit ti laak mi ni khat ah gallon in 240,000 le cerh ti laak mi gallon 558,75, zatuak in zoh ahcun 65% fai a si. Zatuak 65% chung ahhin khual in a ra mi le sianginn a kai mi hna i an hman mi aa tel lo. Ni khat ah dinti a herh taktak mi hi cu, gallon 453,975 a si,” tiah The Hakha Post ah a chim.
Sipin lei nih Hakha khuachung dinti an pek ning hi Dawrthar sang inndawng 2,073 minung in 12,355, Pyidawtha sang inndawng 801 minung in 3,232, Cawbuk sang inndawng 593 milu in 2,703, Khuahlun sang inndawng 88 milu in 337, Dawrhlun sang inndawng 478 milu in 2,059, Khuathar sang inndawng 958 milu in 5,346, Hakhathar No.1 sang inndawng 448 milu in 1,859 le Hakhathar No.2 sang inndawng 500 milu in 2,333 an si. Inndawng dihlak fonh 5,930 le milu dihlak 30,265 a si tiah kan theih.
Hakha dinti ca ah Timit Dam an laak mi zong 2021 kum Cozah thar a kai hlan ah lim dih ding in December 7 Hluttaw a caan hnihnak, caan hman a voi 23nak meeting an tuah ah biakhiahnak an ngei.
