Hakha khuachung ah nihin tiang phunglutlo in inn sa an um peng rih mi tuanvo ngeitu nih report an tuah cang i a rauhhlan ah taza an cuai cang hna lai, tiah tuanvo ngeitu sin in June 19 ah kan theih.
“Hihi an i theihpalh bak mi a si. Sipin Minister hlun Salai Isaac Khen nih, ‘tangka nan liam lai nan inn hmun cu nanmah hmun a si lai,’ tiah upadi hngal loin a rak chimh mi hna kha an zumh sual. Upadi ning ah khakha a si thiam lo mi a si. An inn an theh hlan lo, ni khat ah Ks. 20,000 peng an cawi ko lai. An theh hlan lo cu dantatnak nih a dawi peng ko hna lai,” tiah Chin Ramkulh Upadi Zung Lutlai Pu Sonny Thang Cung nih The Hakha Post ah a chim.
Hi phunglutlo inn sa hna hi Ramkulh Sipin Zung zong nih tazacuai ding in report a tuah cang i phunglutlo inn sa vialte a rauhhlan ah taza an cuai cang hna lai, tiah kan theih.
