Chin Ramkulh, Hakha khuapi chung ah phung zul loin Motorcycle a khal mi tlaih than nak cu 2020 August 7 zinglei sang ah PK nih an tuah i ni khat chung lawng ah 50 leng an tlaih hna i biaceih zung nih dan a tat hna tiah thawng kan theih.
Hakha khuapi Traffic Police lei nih August 1 in tlaih than ding le zohfelnak tuah ding in timhlamhnak an ngei nain tlamtlin lonak tete a um ca ah August 7 lawng in an thawk than mi hi a si tiah Traffic Police Lutlai Ko Ko Maung nih a chim.
“August 7 i kan tlaih mi hna hi a bik in luchin a chinh lomi le License card aa benh lomi pawl an si. Nihin lawng ah kan tlaih mi hna hi an dihlak in cun ka chim kho lo nain 50 leng cu an si. Kan tlaih hna i biaceih zung ah taza kan cuai than hna. Biaceih zung nih anmah le sining cio in dantatnak zong a tuah hna lai. An motorcycle chuh le lakpiak tu cu a um lai,” tiah The Hakha Post ah a chim.
Hakha khuachung ah August 7 thok in an tlaih thluahmah cang hna lai tiah thawng kan theih.
