November 23 in December 15 tiang Hakha Timit dinti laknak meihri cu aa tuam lo mi a si caah aa tuam mi meihri in kan thlen lai, cu caah ni 21 chung ti kan pe kho lai lo tiah Sipin nih November 23 ah ca chuahnak an tuah.
Hi ca an chuah mi kong he pehtlai in Hakha Sipin ah a tuan mi U Man Ha Aum (SAE) nih “Timit dinti kan laknak meihri kan thlen ding mi hi meng 4 a sau. Hi dinti tinnak caah hin Transformer hi pathum kan hman, ti pump nak hi paruk a um. A hlan kan hman mi meihri hi cu aa tuam lo mi a si, ram lak a si fawn caah thingkung, thingnge pawl he an i tawngh sual ahcun aa tuam lo mi a si caah aa rawk (shock) pah leng mang caah a tuam mi meihri in thlen kan timh hi a si. Mei hri hi aa tuam lo mi a si caah thingnge ti bantuk he an i tongh i a rawh tik ah hin khaw zei in dah a rawh ti mi hi theih a har tuk, a line ning pi in kawl lengmang a hau, aa tuam mi meihri in kan thlen ahcun a rawk mi hi aa rel deuh lai. Hi ruang ah thlen kan timhnak hi a si” tiah The Hakha Post a chim.
“Ni 21 chung ti pek lo hi cu mizapi caah a har ngai ko lai, hi caah riantuan kan i dinh hnu zaan suimilaam 6:00 hrawng in ti hi tin khawh kan i zuam lai, kan tin khawh tawk, zarh khat ah voi khat tal hi cu pek khawh ding zong kan i zuam lai” ti zong a chimchap.
Timit dinti meihri thlennak cu November 23 in an thok cang. Hi meihri thlennak hi Sipin budget Ks.131 million dih in an tuah hnik mi a si thiah kan theih.
