Hakha khuachung ah thil man a kai nak a ruang cu dawr ngeitu hna nih The Hakha Post sin ah June 1 ah an chim.
Hi kong he pehtlai in Market ah ei le din zuartu Tial Nawn Nu nih, “Kawl lei in a ra mi hi an kai hna. A ruang cu Cargate le Hakha thar gate ah an thumh i kanmah tein kan va lak chom. Thil phorh man hi a tlawm zong ah a tam zong ah thonghra a si kai lo awk a tha lo. Hakha khua chung ah kan lak mi cu an kai lo,” tiah a chim.
Facang dawrngei tu Pu Ram Or nih, “Facang man zong hi 2000 le 3000 hrawng cu a kai ve ko. A ruang cu Cargate le Hakha thar tiphul lam pial ah kan va lak i motor hlan man a fak tuk ca ah a si,” tiah a chim.
Arsa le Ngasa zuartu Pi Far Tial nih, “Arsa le Ngasa hi cu kan laknak in an kai leng ah dawr ah thlak ngah lo i Cargate le Hakha thar Gate ah kanmah tein motor hlan in kan va lak chom. Cun a hlan ah cun Yangon in Hakha direct a kal mi motor um nain a tu cu Yangon in Kalay ah an kuat i Kalay in Hakha an kan kuat. A hlan ah Boilar ar cu 8000 in kan zuar i atu cu 10000 a phan cang. Ngasa zong voidang nakin a kai deuh,” tiah a chim ve.
Hakha khuachung ah eidin thilman an kai hna nain hnipuan hruk eih cu kan kai lo. Thil phorh man tu cu a kai ve ko tiah Pi Tha Hlei Iang nih a chim.
