October 28 ah Hakha khua pawng, No. 1 Thlanhmun kam Kiamtlang SAC hmunkhuarnak cu CNA le CDF-Hakha i bawm in an kah i an laak tiah thieh a si.
“Chinland Defense Force – Hakha le Chin National Army i bawm in Kiamtlang ah hmun a khuar mi ralhrang hna cu kan kah hna in an camp ningpi in kan laak,” tiah CDF-Hakha nih nihin October 30 ah an thanh.
Kiamtlang camp laak kahdohnak ah SAC ralkap 15 an thi i, Major rank ralbawi tel in SAC ralkap pali a nung in an tlaih hna. SAC hriamnam MA1 zun 5, MA2 zun 1, MA3 zun 2, MA11 zun 1, Mine le kuan zei mawzat zong kan laak tiah CDF-Hakha cathanh ah an langhter.
October 28 ah SAC ralkap nih Rungtlang in hriampi pehtlai in an kah caah Hakha Khuathar sang ah kahdohnak he aa pehtlai lo mi, sualnak ngei lo khuami pali hma an pu tiah kan theih.
Photo: CDF-Hakha
