Hakha khuachung ah Mask huh lo in leng a chuak mi June 25 tiang ah minung 332 leng an tlaih cang hna tiah June 26 ah kan theih.
Hi kong he pehtlai in Hakha sii-inn uk Dr. Mang Biak Kung nih, “Hakha khua chung Mask huh lo in leng chuak mi June 25 tiang ah minung 332 an tlaih cang hna. Mask i huh tik zong ah voi khat lawng hman mi Mask pawl acheukhat nih zarh hnih tiang hna an hman. Voi khat lawng hman mi Mask pawl hi ni khat chung (24 hours) lawng hman ding a si. Ni khat hnu in cun i huh zong ah thathnemnak a um ti lo. A si khawh ahcun hman ti lo ah a tha,” tiah The Hakha Post ah a chim.
“Mask aa hup lo mi pawl tlaih cu Hakha COVID-19 Response Committee le cozah lei i bawmh in kan tlaih hna. Dantat ning tu cu anmah nih a herh ning in an tawlrel. Biaceih Zung ah an kalpi hna i tangka dan an tat hna,” tiah Dr. Biak Cung Lian nih The Hakha Post ah a chimchap.
