Thaal a chuah cang bantuk in Hakha khua ah dinti a har cang i khuami lungrethei in an um, tiah khuami cheukhat sin in March 7 ah thawng kan theih.
“Thaal a chuak cang. Timit dinti zong a ngah cang an kan ti lengmang ko nain nihin tiang cu kannih kan hmu kho rih lo. Minung khuasaknak ah ti le mei cu a herh bik a si bantuk in dinti kan har cang tik ah lungrethei in kan um ko,” tiah Pyidawtha Sang chungkhar pakhat nih The Hakha Post ah an chim.
Hi dinti har kong ah Pyidawtha inn ngeitu nu pakhat nih, “Dinti kan ti ko nain ti an kan pek mi zong kan har cang pin ah a bik in kan din mi, dintithiang zuar pawl zong an man a kai kho mi a si tik ah zapi zaraan cu lungrethei in kan um ko,” tiah The Hakha Post ah a chim.
“Kannih Hakhathar hi Lungphuntlang hrawng cu Timit dinti zarh khat ah voi hnih an pek hna nain Naahautlang lei hi an pek hna lonak a sau ngaingai. Cu hlan bantuk in motor nih dinti rak zuar zong a um ti lem lo. HRC zong nih dinti an rak kan ngalh pah tawn i aa ning ngai ko. Amah belte, thaal a si cang bantuk in lungrethei cu a si ko,” tiah Hakhathar Pastor pakhat nih The Hakha Post ah a chim.
“Kannih Hakhathar No. 2 Sang cu dinti kan har ti chim hau lo khi a si ko. Kan khua pawng i sih le cerh puut mi pawl kha kan than i kan hman ko. Thaal a chuak i tihna a kang kho i, ti a reu khawh tik ah lungrethei cu a si ko,” tiah Hakhathar No. 2 Sang upa pakhat nih The Hakha Post ah a chim.
