Ralkap nih uknak a laak hnu ralkap uk kan duh lo ti langhter a ni 23nak Hakha i lam a zawh i tlaih a tong mi minung 23 chung ah minung 19 cu 2021 March 2 suimilaam 3:26PM ah an thlah than cang hna tiah theih a si.
Hi kong he pehtlai in Council lei rianngeitu pakhat nih, “Hakha i tlaih mi minung 23 chung ah minung 19 cu thlahthan an si cang. Nu pahnih le pa pahnih an taang rih. Atu a taang mi hna hi cu midang he an i khat lo. Lam an zawhnak ah nifatin an i tel. Midang he an i tinhmi hi aa khat lo ca ah kan hren rih hna. Cun, hren rihmi pali chung ah pahnih hi Cozah riantuan CDM cawlcanghnak ah an i tel lawng si loin lamzawhnak ah nifatin aa tel ve mi an si. Anih hi cu a fek liomi upadi ning in kan hren rih hna lai,” tiah a chim.
Ralkap nih uknak a laak hnu Chin Ramkulh chung ah lam a zawhmi hna chung in an tlaih mi dihlak minung 28 an si cang. Hi an tlaih mi hna hi Falam ah minung pathum le Hakha ah minung 25 an si. Falam i tlaih a tong mi hna hi cu rianngeitu hna nih 505B in taza an cuai hna tiah theih a si.
Atu Hakha i an hren rih mi minung pali chung ah nu pahnih hi cu aa-ma-khan in a chuak kho ding dirhmun an si tiah kan theih.
