Hakha, GTI sianginn cachim saya/ma minung 50 chung ah minung 43 cu ralkap uk kan duh lo ti langhternak ca ah Civil Disobedience Movement cawlcanghnak ah an i tel tiah theih a si.
CDM a tuah mi GTI sianginn cachim saya/ma te kong he pehtlai in sianginn uk Dr. Salai Tluang Za Thang nih, “Hakha GTI sianginn ah cachimtu saya/ma minung 50 an um. Hi chung ah minung 43 nih CDM an tuah. CDM cawlcanghnak hi hmual a ngei ngaimi a si ti chim khawh a si. Keimah leikap in tuah hlah uh timi hramhram in ka ti hna lo. Anmah pumpak duhthimnak te a si ko. Cun, CDM a tuah lomi hna zong anmah lei tlamtlin lonak tete a um i a si lai. Cun, anmah zong hi CDM nan tuah lo, tuah hrimhrim uh tiin hneeknak nawl zong kan ngei hna lo. Zalong tein duhthimnak a ngei dih mi an si ve ko,” tiah a chim.
Hakha khuapi chung Cozah riantuan minung 3000 fai chung ah minung 2500 leeng hi cu CDM cawlcanghnak ah aa telmi an si cang. Cun, a dangdang zong CDM ah aa tel nain cazin a pe rih lomi zong tampi an um rih tiah theih a si.
