Hakha Gangaw lam ah motor dinhnak Ks. sing 500 dih in an cawhchap lai

Hakha Gangaw lam ah motor dinhnak cu Chin Ramkulh Sipin hruainak in tuah timh a si i Ks. sing 500 dih in an cawhchap lai tiah thawng kan theih.

Hi cawhchap ding mi hi atu an cawh cianak ah khin kau deuh in an cawhchap lai. Atu hi mizei nih an tuan lai a fiang rih lo. Tender an auh cuahmah lio a si i April 25 ah an zuar te lai.
“Hi tuah ding mi hi July thlachung ah lim dih ding in kan timh. Motor ngan ke 12 pawl zong cukaa hmun ah kan dinhter hna lai i khuachung ah luhter ti lo in khualeng ah thumhnak kan tuah cang lai. Kan tuah ding mi hi a kau lai i motor 100 leng tlum ding in kan tuah lai,” tiah Chin Ramkulh Sipin Lutlai Pu Thla Hre nih The Hakha Post ah a chim.
Hakha ah motor dinhnak hi Sipin nih hmun 3 ah an tuah. Falam lamlei kalnak ah pakhat le Thantlang lamllei ah pakhat an tuah. Falam lamlei le Thantlang lamlei hi an lim cang i lungphah ding a tang.
“Hi lungphah hmasa hlan cu hman awk a tha lo. Hakha cu vawlei a nem pin ah fur ahcun nawncek ah aa chuah sual lai kan phang. Cucaah 2018-2019 tangka kum ah lungphah ding in budget kan hal than lai,” tiah a cunglei upa nih a chimchap.