Hakha Electric tuanvo ngeitu Electrical Power and Controls Inc. (EPC) nih ningcang loin mei man an laak ko rua, a let thum deng in thla thum chung an kan laak cang, tiah a zai mi an um, tiah April 11 ah kan theih.
Hi mei man kong he pehtlai in Hakha Peng Electric Zung Lutlai nih, “Ka naule nih an palh khawh men. Meter zoh ning zong an palh khawh mi a si ca ah felfai tein kan zohfel lai,” tiah a chim bal nain thla thum chung cu mei man ningcang loin an laak thiamthiam ko rua, tiah mi cheukhat an zai.
“Zeitik hmanh ah mei man hi Ks. 18,000 cung an kan hal bal lo. Ks. 48,000 bak in thla thum chung an kan hal cang. Hihi zeitindah a si khawh i meter zoh an i palh hna a si kho maw. Ka khuaruah a har ko cang. Kanmah lawng kan si lo. Kan innpawng chungkhar pakhat zong cu thiamthiam in an hal ve hna,” tiah Hakha Dawrthar Sang um, min langhter lo mi nu pakhat nih The Hakha Post ah a chim.
Mei man kong ah Pyidawtha Sang nu pakhat nih, “Kannih zong March thla ah khan Ks. 32,000 hrawng an kan laak. Voi dang ahcun Ks. 17,000 cung an kan la bal lo. Hihi cu ruah deuh a hau cang lai,” tiah The Hakha Post ah a chim.
“Mei zong a mit lengmang. Zingka rawl kan chuan lio ko ah hin a mit khun mi a lo fawn. Duhning hmanh in mei kan hman khawh lo lio ah mei man tu cu a let in an kan laak tik ah hihi cu cungleipi tiang ah chim ka duh ngai cang,” tiah min langhter lo mi pakhat nih The Hakha Post ah a chim.
Photo: Internet
