Chin Ramkulh Cozah nih Hakha dinti hmuh nakding Ti Committee thar a ser i hi committee nih Hakha dinti hmuh nakding rian a tuan lai, tiah Chin Ramkulh Cozah Zung in kan theih.
Hakha dinti hmuh nakding ah Timit tiva dil a si i nihin tiang a tlamtlin lo ca ah khuami dinti har in an um. Cu kong ah Chin Ramkulh Cozah nih Hakha Ti Committee hlun kha dinhter chung in Ti Committee thar a ser hi a si, tiah kan theih.
Ti Committee thar sernak kong he pehtlaih in Chin Ramkulh Sipin Minister le Chin Ramkulh Cozah Zung Chimphuannak Nawlngeitu Minister Pu Soe Htet nih, “Hakha dinti hmuh nakding Ti Committee a thar ser than mi a um. Ramkulh Sipin Zung, Sakremhnak Zung, Semyaung Zung le Lamlei Zung i fonh in Ti Committee thar ser a si. Hlan deuh i Ti Committee hlun kha kan dinhter chung hna i ser thar mi Ti Committee he hmun khat ah riantuan kan timh. Hmun khat ti mi chung ah hin Chin Ramkulh Cozah Phu zong an i tel. Kei tu hi Sipin Minister zong ka si bantuk in a biapi in tuanvo a latu ding ka si. Asinain, riantuannak tu ah cun hmunkhat ah tuan in tuanvo i pek a si,” tiah The Hakha Post ah a chim.
Hakha khuachung ah dinti khonnak hmun 12 a um. Cu hmun 12 cu pakhat hnu pakhat felfai tein zohfel i tawlrel ding mi a si i amah le ningcang tein tuan ding le tawlrel ding timh a si, tiah kan theih.
“Hi dinti khonnak hmun 12 chung ah hmun 6 kha hun remh le hun tuah than nakding ah tangka Kyats sing 2,000 a herh. Cu ti kan tuah khawh ahcun, Khuathar le Dawrthar lei nih dinti an hmuh khawh lai. A taang mi hmun 6 remh than le tuah than nakding, Khuahlun le sang dangdang nih dinti an hmuh khawh nakding ah tangka Kyats sing 7,000 tluk a herh rih,” tiah Minister Pu Soe Htet nih a chimchap.
Hakha Timit dinti khuachung pipe line zamhnak a tuantu company nih rian a tlamtlinh lo ruang ah Chin Ramkulh Cozah sin i a pek ding mi tangka a um, tiah kan theih.
Cu kong ah Minister Pu Soe Htet nih, “Keimah ka ruahdamh ning ahcun khuachung hi cu tu hnu thla ruk, kum khat hrawng ah cun dinti a tlamtling lai, tiin ka zumh,” tiah a ruahnak zong a langhter. ###
