Hakha, Dawrhlun sang ah a um mi inn pakhat cu nihin August 13, Zarhpi ni pumh kar ah mifir nih an bohpiak hna tiah kan theih.
Mifir nih an bizu thil an leh dih i thilpuan zeihmanh an la lo nain, tangka MMK singli le Power Bank an lakpiak hna tiah kan theih.
Inn bohpiak a tong mi chungkhar nih, ” Atu lio cu harsat lio cio caan a si caah i ralrin cio kan hau ko. Cun miphun zong kan i cawh ngai cang i a hlan bantuk in daithlan awk kan tha ti lo. Sang upa zong nih kan sang ah zei bantuk mithar dah an um ti khi rak kan zohngiat/theihpiak pah lengmang hna sehlaw thil tha ngai a si hnga. A bik in mah pumpak cio hrim in ralrinnak kan ngeih a herh tuk cang” tiah a chim.
Ralkap nih nawlngeihnak hramhram in an laak hnu in pawcawmnak a har caah Myanmar ram hmun kip ah fir, thil chuh le inn boh tibantuk a karh i Hakha khua zong ah inn boh le mifir thawng theih pah lengmang a hung si.
