COVID-19 zawtnak ruang ah seh thilri ah hman mi datsi le diesel man Myanmar ram chung hmun tampi ah a tla ko nain Hakha ahcun zapi nih a man an tlakter duh lo tiah kan theih.
Datsi man kong he pehtlai in Gangaw lam ah dawr a tuah mi Htoe San Tit dawrhngak pakhat nih, “COVID-19 zawtnak a chuah hlan ahkhan cun datsi 92 hi gallon khat Ks. 4000 in kan zuar. Asinain atu ahcun zawtnak ruang ah kan laknak zong a man an tum i kanmah lei zong nih gallon khat ah Ks. 3000 in kan zuar ve. Datsi 95 tu hi a man Ks. 100 in a tam deuh. Cun, Diesel man zong hi a hlan ahcun Ks. 5000 le 4000 kar in zuar a si i, atu ahcun a man tum dih a si,” tiah The Hakha Post ah a chim.
Chin Ramkulh chung Falam, Thantlang, Tedim le Mindat pawl zong ah datsi le diesel man an tla dih tiah kan theih.
Cun, Falam lam Myit Ta Mun Datsi dawr ngeitu nih, “Kan nih hi a hlan ahcun Ks. 4000 in kan zuar i COVID-19 zawtnak a chuah hnu in gallon khat Ks. 2000 in zarh hnih hrawng kan zuar i, atu hi tlawmpal te a man a kai deuh ca ah Ks.2700 in kan zuar,” tiah The Hakha Post ah a chim.
Khuami pakhat nih, “Datsi le Diesel a zuar tu hna hi an zuar ning aa khat cio lo. Cheukhat dawr ahcun a man a fawi ngai nain cheukhat dawr ve ahcun a hlan bantuk tein an zuar rih ko. A bik in lam kam ah thlam fate sak in a zuartu hna khi a man an kai ngaingai,” tiah The Hakha Post ah a chim.
2020 May 26 tiang Yangon le Mandalay ahcun datsi 92 liter khat Ks.390 le datsi 95 liter khat Ks. 530 a si tiah kan theih.
