Ralkap nih uknak a laak hnu ralkap kuttang ah riantuan ka duh lo, ralkap uk ka duh lo ti langhternak ca ah Cozah riantuan hna zung kai loin CDM an tuah i, hi chung ah Hakha khuapi chung Cozah riantuan minung 3000 fai chung ah then thum then hnih cu CDM an tuah cang tiah theih a si.
CDM Supporting Team for Hakha nih 2021 February 28 zaan i cazin a langhter ning ah CDM a tuah cang mi minung dihlak 2129 an si, Hakh Cozah riantuan minung 3000 fai chung ah a tam deuh cu CDM ah an i tel cang ti hmuh khawh a si.
Hi kong he pehtlai in CDM Supporting Team for Hakha tuanvo ngei pakhat nih, “Hakha i Cozah riantuan a tam deuh hi cu CDM ah an i tel cang. February 28 tiang CDM aa tel mi hi minung 2129 an si. A fawinak cun Hakha i Cozah riantuan a tam deuh cu CDM an tuah cang tinak a si. Cun, hihnu hmailei caan zong ah aa chap mi an um rih lai ti hi kan zumh. Aruang cu Cozah zung lei in a hlan an sianh lomi hna, an hnek mi hna chung zong in kan i tel than cang lai tiin a kan chawntu an tam ngai. An i chap rih ko lai ti hi kan zumh ko,” tiah The Hakha Post ah a chim.
Hakha i CDM aa tel mi hna hi zung in zung 51 an si i, hi chung ah CDM ah aa tel mi a tamcem zung hi minung in cun Fimcawnnak Zung rian a tuan mi an tam cem. Cun, zatuak in Thingram zung a tuan mi hna hi 90% in an tam cem tiah cazin an langhter mi chung ah hmuh a si.
Cun, Hakha khuapi chung i Cozah riantuan CDM ah aa tel mi cheukhat cu lawmhpinak ca ah tiin tangka minung pakhat ah Ks. 50,000 cio minung 1000 leeng sin ah an pek cang hna tiah theih a si.
