Hakha COVID-19 Response Committee nih bawmhnak an hal mi chung in May 5 tiang ah sing 132 an hmuh cang tiah May 7 ah kan theih
Hi an hmunnak kong le an hmannak kong he pehtlai in Hakha COVID-19 Response Committee Chairman Salai Van Cin Thang nih, “Hakha khua chung ah a bik in phu pathum in kan then hna i pakhatnak ah biaknaklei kan hal hna. Pahnihnak ah Company ngei mi hna le pathumnak ah Sang 8 chung ah bochan mi pawl kha ca in kan pek hna i bawmh kan hal hna. Ramleng lei hi cu Go-fund-me in bawmh kan hal hna,” tiah The Hakha Post ah a chim.
“Kan cawlcangh ning hi a tam ngai cang. Cu lak ah a biapi bik in kan tuah mi pakhatnak ah Hakha sii-in ca ah a herhhai mi sii le COVID-19 runvennak ca ah a herh mi pawl le PPE 100 kan cahpiak lio hna. Pahnihnak ah Facility Quarantine an chiah mi hna hmun thum ah Cozah nih an bawmh mi hna pinlei i an chambaunak pawl kan bawmh hna. Hakha College i Facility Quarantine a um mi hna cu ti an har ngai. Hi bantuk an chambaunak pawl kha bawmh kan halpiak hna. Facility Quarantine an chiah mi hna rawl pek zong kan naule nih chunzaan in an i then hna i zohkhenh hna. Pathumnak ah Gangaw lam le Matupi lam lei kha cunglei bawmhmak in kan hngah hna. Matupi lam lei hi cu a cunglei minung an i phakzawh lo ca ah Cawbuk Sang upa pawl le mino hna he i bawm in kan hngahti hna. Palinak ah Home Quarantine um mi pawl zohfelnak kan ngei. Sang in kan i then hna i Ngandamnaklei tuanvo ngeitu hna le kan naule i bawm in kan zohfel hna,” tiah a chimchap.
Atu tiang ah Hakha COVID-19 Response Committee ah volunteer min cazin aa pe mi an dihlak minung 248 an si cang tiah kan theih.
