Hakha, Cawbuk sang, khuabawi Pu Tan Lwin Oo a rian phuahpiak ding in sang chung inn 230 nih an hal mi cu Cozah lei nih 2020 October 27 ah a rian in an dinh ter cang, tiah thawng kan theih.
Pu Tan Lwin Oo a rian phuahpiak ding in Cawbuk sang, inn 230 nih Chin Ramkulh, Cozah sin ah 2020 kum July thla in an rak hal i, Cozah lei nih zeihmanh lehnak a rak tuah hna lo ca ah 2020 October 29 ah lamzawh an i tim nain atu ahcun an leh cang hna ca ah lamzawh zong an i leet than cang tiah theih a si.
Hi kong he pehtlai in Cawbuk sang a lamkip thanchonak bu Secretary Rev. Moses Bawi Thawng nih , “Cawbuk sang kan khuabawi a tuan mi Pu Tan Lwin Oo hi pumpak in kan huat a si lo, kan rem lo a si lo. A riantuan ning hi sang chung mi nih kan zoh tik ah a tha lo ngai i Cozah sin ah a rian phuahpiak ding in kan rak hal. Kan rak hal ka ahhin Cozah lei nih zeihmanh thawngthanhnak le chimnak an ngei lo. Chimnak an ngeih lo tik ah lamzawh ding timhlamhnak kan ngei. A rian hi kan phuahpiak hna hlah sehlaw cu 2020 October 29 hi lamzawh kan i tim. Asinain, atu ahcun kan duhnak a tlin cang ca ah zeihmanh cawlcanghnak a um ti lai lo,” tiah The Hakha Post ah a chim.
Pu Tan Lwin Oo a rian a chawngtu ding hi 2018 January thla chung thimnak rak tuah lio ah a pahnihnak mee tamcem a rak hmutu Pu Tawng Lwin a si. Cun, inn 10 uk le inn zaa uk pawl zong a thar in thlen dih an si lai tiah Hakha Penguk Zung lei in theih a si.
