Hakha khua ah luphum in mission rian a rak tuantu Carson le a dang Siangbawi hna an vui hnanak thlaan a hlunh tuk cang ca ah a thar in an sak than lai, HBA tlangtlaknak in February 2 ah an theh cang.
“Hi Carson thlaan cu 2015 kum Hakha mincimh ton lio ah zeimawzat a cimh ve ca ah a fekfuan ti lo, a rop cang ca ah atu bantuk in a thar sak ding in an thawk hi a si. A design zong hi chanthar sining he aa tlak ti lo,” tiah HBA GS Rev. J. Nawl Cung Lian nih The Hakha Post ah a chim.
Carson thlaan thar sak mi cu a hlan nakin ngan deuh le kau deuh in tuah a si lai i a kiangkap ah thlacamnak le thutdirnak tha zong tuahchih a si lai, tiah kan theih.
“Hlan kha cu hun luh le cangka in thlaan kha hmuh khawh colh a si. Asinain, a thar ah cun thlaan kha thlalang in kan kulh cang lai, cun, signboard zong tha deuh in kan tuah lai. Ruhro umnak thlaan cu kan tawng lai lo, kan cihnak inn tu hi a thar in sak ding, kan ti mi cu a si,” tiah Rev. Nawl Cung Lian nih a chimchap.
Hi thlaan thar sak mi cu February 7 ah Power 7 Company nih tuanvo laak in a sak lai i May thla dih ah lim ding in a sak lai. Hi saknak ca ah tangka sing 900 renglo a dih lai, tiah kan theih. The Hakha Post
