Hakha Calvary Baptist Church Biakinn thlang ah motor nih inn a pah, pakhat sii-inn phan
====================================
2020 January 23 chun suimilaam 11:30 hrawng ah Hakha Chin Oo Si Sang Calvary Baptist Church Biakinn thlang (Cozah Bank thlang) ah motor No. YGN 9F-2778 kungkaa a fa mi nih inn a pah i, minung pakhat sii-inn a phan, tiah kan theih.
“Motor nih inn a pah lio ah hin, kei cu sianginn ah ka um. Ka farnu le ka nu lawng an um. Ka nu hi inntang ah nitlang a toh lio a si. Ka farnu tu cu coka ah a um. Ka farnu cu aa khawng lo. Ka nu tu cu a lu tlawmpal aa khawng i sii-inn ah kan kalpi. Asinain, thinphang a si lo, a lungfim ko, a dam ko lai,” tiah inn ngeitu Pu Thla Ling (No.3 siangcachim) nih The Hakha Post ah a chim.
“Motor nih inn a pah lio ah motor cung ah minung 7 hrawng an i cit i an i khawng lo. Motor hi a break poh a si ko lai,” tiah motor nih inn a pah lio i a hmutu cheukhat nih The Hakha Post ah an chim.
Motor ngeitu hi Leitak khuami Pu Khua Kam a si. A khaaltu hi Kawl a si, tiah kan theih. Atu bantuk in Hakha khuachung ah, motor nih inn pah hi a hlan zong ah a rak um bal cang.
