Hakha khuachung bank pawl cu a hlan an kal pi ning in pehzulh in tuan a si ko, tiah theih a si.
Hi kong he pehtlai in Hakha KBZ bank riantuan mi pakhat nih, “Bank kan riantuannak hi buaibainak cu a um lo, a hlan bantuk in tuankel tein in kan tuan ko, tangka lut chuak zong hi a hlan ning tein tuan a si ko” tiah The Hakha Post ah a chim.
Cun, CB bank zong nih February 2 in bank pawl tha tein kan hon than cang. Riantuan ning zong a hlan bantuk in a si ko, ATM, CRM le Internet Banking, CB Pay pawl zong a hlan ning tein a si ko, tiah Facebook cahmai ah an langhter. AYA bank zong nih an facebook ca hmai ah langhternak zong an tuah ve.
February 1 rampi buaibainak a um caah phone line pawl le internet line pawl a tlau dih caah bank pawl zong rian an tuan kho hna lo. Hakha bank pawl cu February 2 in tha tein a hlan an riantuan ning in an tuan kho than cang tiah theih a si.
