Hakha khua ah thingkep pangpar khuate lei in an rak zuar mi kum dang nakin a cawtu an tam i a man a tha tiah khuami pangpar zuartu hna sin in thawng kan theih.
“Kum dang nakin tukum ah thingkep pangpar a caw mi an tam i a man deuh. Cu hlan cu Kawl lei mi deuh nih an cawk nain atu ahcun kanmah Laimi khuami hrimhrim nih anmah inn le dum i cin awk ah a kan caw mi an tam ngaingai,” tiah Hakha khua ah thingkep par a zuar mi nu pakhat nih The Hakha Post ah a chim.
A man kong he pehtlai in “Tom khat ah Ks. 1,000 in Ks.2,000 hna kan hauh. A zeimaw cu mahnak fak zong a um. A cheu cu mahnak tlawm zong in kan zuar. Thingkep par hi a phunphun in a um. Senri, par-raang, mitkuh, caangtial ti le a dang mahle khua umnak minsak ning kan i khat cio lo,” tiah a cunglei pangpar zuartu sin in kan theih.
Atu i an zuar mi hi hlan i Kawl lei le Tuluk ram i an rak kuat mi sii le tamhnak le a dang i an hman mi manfak pangpar bantuk kha si lo in a paar aa dawh mi pawl an si.
A zuartu hi khuate lei nih an va hrawn i an rak zuar mi a si. Thaal chuahka khan atu tiang an paar i an zuar peng rih.
Cozah zong nih hi bantuk aa dawh mi inn i ciin ding mi pangpar zuar hi cu an khap lo, zeicatiah ramleng i zuar mi a si lo i ramchung ah zuar mi a si i a cawtu zong nih mah inn le dum ah aa dawhnak zoh ding le thinlung ngandamnak ca ah an cin mi a si ca ah khap a si lo, tiah a zuartu sin in kan theih.
Chinram ah thingkep par tampi a um nain a man a that pah ca ah ramlak i thingkep par tu cu an tlawm ngaingai cang. Cucaah hi Chinram le miphun min a putu thingkep par kilvennak le karhternak rian hi Chin ramkulh cozah nih pakhat khat cun tuanvo a laak ah a tha tiah thingram lei runvennak tha a petu hna nih an chim.###
