Hakha khua ah Christmas le Kum Thar tuah nak kong he pehtlai in Hakha Christian Minister’s Fellowship (HCMF) cu November 4, IBC biakinn ah meeting an tuah i, kan hman lai mi 2023 Christmas le 2024 Kum Thar cu sathah rawl dumtinak in tuah lo ding le, mahle biakinn cio ah Pathian thangthat pumhnak in tuah si seh tiah bia an khiah.
”Kan ram sining ruangah Christmas le Kum Thar kan tuah khawh lo nak kum 3 a si cang. Tukum zong kan ceih than i atu lio kan ram sining kan ruah tikah a luancia kum bantuk in pumhnak le Pathian thangthatnak in Biakinn ah kan tuah cio hi a tha bik ko tiah kan ruah,” tiah thawng thanhnak ah an langhter.
Cu an meeting ah cun Biakinn/ sang le veng/pumpak nih Christmas le Kum Thar ah a bupi in sathah rawl dumtinak tuah lo ding zong biakhiahnak an ngei.
Biakinn tamhnak khua chung tamhnak kong he pehtlai in; Biakinn chung cu mah le duh ning in țamhnak (Decoration) tuah cio ding, Biakinn leng cu Biakinn signboard lawng țamh ding le Biakinn leng tual țamhnak tuah lo ding zong HCMF nih Hakha khua chung Khrihfabu dihlak ah thawngthanhnak le nawlnak an tuah.
