Hakha ah Sangthar samh mi acre 100 hmanh tawlrel khawh hlan ah acre 500 samh timh than

Hakha ah Sangthar samh mi acre 100 hmanh an tawlrel dih hlan ah acre 500 samh an timh than tiah April 12 ah thawng kan theih.

“Cawbuk le Khuahel lam hrawng ah khin acre 500 kan samh than lai. Cun, acre 100 kan samh cang mi zong inn hmun a hmutu nih Ks. 500,000 cio an thawh lai i lam le hmunhma sersiamnak ah kan hman lai. Cun, thla 6 chung hrimhrim ah an sak lai. Khuapi muisam keng in inn zong an sak lai. Cun, awngbali in an hmuh mi inn hmun hi zuar khawh a si lo,” tiah Hakha Sipin Committee Chairman Pu Ngun Vung nih The Hakha Post ah a chim.
“Acre 100 an samh cang mi hmanh duhning in an kan tuahpiak rih lo. February thla ah awngbali an kan zuhter nain nihin tiang kan tinco mi hmun hmanh kan hngal lo. Cu lio i acre 500 samh an timh hi cu ruah deuh a hau. Acre 500 samh an timh mi hi kan i lawm tuk ko. Asinain, acre 100 an samh cia mi hi tlamtling deuh in tawlrel hmasa hna sehlaw thil umkalning aa dawh deuh hnga,” tiah min langhter lo mi pakhat nih The Hakha Post ah a chim.