Chin Ramkulh Cozah nih Hakha ah phungninglo inn sa mi August 17 ah thehpiak ding ti mi kha aa palh mi a si, August 19 ni tu a si, tiah Chin Ramkulh Cozah Chimphuannak Nawlngeitu le Sipin Minister Pu Soe Htet nih August 7 ah a chim.
“A hramthawk ah khan cun, August 9 ah theh ding kan ti nain HCMF in Pastorte nih an kan len i a nicaan sauhpiak rih ko hna u, an kan ti ca ah August 19 ah kan thawn mi a si. August 17 ti mi kha aa palh mi a si,” tiah Minister Pu Soe Htet nih The Hakha Post ah a fianter.
Lamsuul Minister Pu Sui Thio nih, “Upadi ning in kan sak mi a si ko an ti ve ko. Kanmah zong nih upadi ning in rian kan tuan ve ko i kan theh taktak ko lai. Pumpak huatnak ruang ah le neekngeihnak ruang ah kan tuah mi a si lo ca ah kan rian cu kan pehzulh ko lai,” tiah The Hakha Post ah a chim.
Hi inn thehpiak ding kong ah La-Wa-Ka le Milu Thazaang Minister Pu Phuai Ar zong nih HCMF nawlnak ruang ah a nicaan thawn mi a si i thehpiak an si ko lai, tiah a chim bantuk in Lamsuul Minister Pu Sui Thio nih siseh, Sipin Minister Pu Soe Htet zong nih siseh, HCMF mithmai zoh in a nicaan thawn a sinak le theh taktak ding timhtuah a sinak atu bantuk in The Hakha Post ah an chim hi a si.
