Hakha khua ah phungluutlo asiloah licence ngei lo inn ngei 500-1000 kar an um i upadi ning in dantat an si lai, tiah August 8 ah Chin Ramkulh Cozah Sipin Minister Zung in kan theih.
“Hakha cu Chin Ramkulh khualipi pakhat a si. Ningcangte le zohdawh tein kan sersiam a hau. Phungluutlo asiloah licence ngeilo inn pawl cu Sipin upadi le Uknak Zung upadi ning in dantat an si ko lai. Inn 1000 deng an si. Hihi anmah fahnak ca ah kan timhtuah mi zong a si lo. Hi hnu hmailei ah ningcang tein a kal khawh nakhnga ca ah kan ti mi tu a si,” tiah Chin Ramkulh Cozah Sipin Minister le Chimphuannak Nawlngeitu U Soe Htet nih The Hakha Post ah a chim.
Hi zatzat phungluutlo inn ngei an um mi hi mirum nih ningcanglo in an rak zuar mi hmun ah inn an sak ca ah a si i pupa ram tibantuk tiang a chuahnak zong a si. Sipin Committee, Khuanu Khuapa le Uknak Zung nih a si khawh chung in kan tawlrel lai. Upadi ning in dantat peng an si ko lai, ti zong a cunglei Minister nih a chimchap.
