Chin Ramkulh Hakha khualipi hrambunh mi Paletwa Ralzaam Bawmtu (PRB) phu nih kan unau Paletwa ralzaam pawl bawmh- chanhnak ca ah Hakha khuachung innkan loin bawmh halnak an tuahpiak hna lai.
“Hi bawmh halnak hi 2019 June 25 – 28 tiang inn kip, sang kip, hrelh lo tein kan luhhnawh hna lai. A donghnak June 29 ni khi cu motor in zalam thluan ah keh vorh chawdawr pawl sin ah bawmh halnak tuahpah in kan hlasakthiam pawl he kan vahhnawh hna lai,” ti in PRB an hruaitu Salai Elisma nih The Hakha Post ah a chim.
“Hakha khuachung Khrihfabu dihlak, Cozah zung dihlak, sii-inn, Boarding School dihlak, Private School dihlak, Company dihlak, NGO dihlak, pumpak in a nung kho deuh tiah ruah mi pawl zong hal dih kan timh hna. July 1 hi bawmh halnak a dih in thawngfianhnak kan tuah hnu ah, kanmah mipum hrimhrim kal in Paletwa kan unau pawl sin ah bawmhnak tangka kan pek mi kha tuanvo ngeitu hna sin ah va pek kan timh hna,” ti zong Salai Elisma nih a chim.
A cunglei tinh mi caan chung ah i bawm in bawmhnak a haltu ding hna cu; HUSO, Khrihfabu kip mino upa, Sang kip mino upa, Hakha khuachung um Pengtlang bu, Zophei Student hna an si lai, tiah kan theih. Pehtlaihnak: 09 – 257157209###
