Chin Ramkulh, Hakha khuachung motorcycle fir in a vaak mi hna cu Hakha Palek, Khua hngak Palek Lutlai U Aung Phyo Wai hruainak in tlangval minung pali an tlaih hna i Hakha Palek nih pohma 380 in taza a cuai hna i sakhaan ah a hren hna, tiah kan theih.
Hi kong he pehtlai in Hakha Palek Sakhaan Lutlai U Myo Win Hlaing nih, “2020 May 1 suimilaam 11:00AM ah Hakha Palek Zung, Khuahngak (Ne-thing) Palek Lutlai U Aung Phyo Wai hruainak in Hakha khuapi, Khuathar sang, Kohkun chung an i chawh lio ah Khuathar um Salai Timothy (Chin) nih motorcycle license Card um lo, a hmailei mei um lo mi le Stricker benh dih mi FZ motorcycle a rak i cit an hmuh i lunghrinh in an tlaih. Cun, Salai Phun Kui Thang nih cuka hmun thiam ahcun motorcycle license card um lo mi le a cover pawl a um lo mi FZ motorcycle a rak i cit ve i lunghrinh in an tlaih thiamthaim. Palek sakhan ah an kalpi hna i, bia an hal hna tik ah an sual an i phuang. Cun, anmah an sual an i phuan lawng si loin anmah he fir ah a vaakti mi minung pahnih zong an sual an phuan hna i, atu bantuk in Palek lei nih taza kan cuai hna hi a si. An bia tu hi cu Hakha Peng Biaceih Zung nih a herh ning in a ceih te hna lai,” tiah The Hakha Post ah a chim.
Cun, “Atu motorcycle an fir mi chung ah FZ pakhat hi Chin Ramkulh Cozah Lamsuul Minister Pu Sui Thio PSO pa ta a si i, a rak hlam cang. A taang mi zong hi Palek sakhaan ah rak ra in a ngeitu nih rak hlam khawh a si,” tiah a chimchap.
Motorcycle an fir mi a dihlak hi FZ motorcycle pathum le KENBO R/125 anak mi panga a si. KENBO R/125 panga le FZ pakhat hi Hakha Khuathar khuasa Salai Timothy te inn ah an chiah tiah kan theih.
