Hakha Dawrthar Sang ah U Khin Maung Tun (kum 35) nih kum tling lo pa ngakchia kum 7 April 8 zaanlei 4:00 hrawng ah a tlaihhrem tiah Hakha Palek Zung in thawng kan theih.
Hi kong he pehtlai in Hakha Palek Sakhaanhmu Duh Yehmu Thein Zaw Oo nih, “Hi bantuk in pa le pa si pin ah kumtling lo ngakchia tlaihhrem hi cu tih a nungtuk mi sualphun a si. Upadi ning in kan twalrel lai,” tiah The Hakha Post ah a chim.
U Khin Maung Tun hi Kawl a si i Hakha khua cozah zung pakhat ah caphawtu rian a tuan lio mi a si. Hakha a umnak zong a sau cang i an innpa he ngamhtlak in a um tawn mi a si. Innpa he an i ngamhtlak cang tik ah ngakchia pa cu a donthlah tawn i atu bantuk in a tlaihhrem khawhnak a si.
Hi kong he pehtlai in chekhlatnak a tuahtu KMSS in Salai Dawt Lian Hmung nih, “Hi bantuk in ngakchia kum tlinglo le pa hna tlaihhrem hi cu a poi kho tuk. Kanmah lei zong nih upadi ning in Cozah lei nih an tawlrel khawh nakding ah kan i zuam cuahmah ve. Chin Ramkulh Social Affairs Minister Pu Pau Lun Min Thang zong kan chimh cang. Upadi ning in an tawlrel hlan lo cu kan dai lai lo,” tiah The Hakha Post ah a chim.
Hi ngakchia a tlaihhremtu U Khin Maung Tun nih atu voi khat lawng si lo in voi sarih tiang a tlaihhrem cang i na chim ahcun kan thah lai tiah a rak tlerh ca ah ngakchia pa nih a rak chim ngam lo. A tlaihhrem lio an hmuh hna hnu tu in ngakchia pa nih a chim mi a si. Ngakchia pa a tlaihhrem lio a hmutu pa nih a thinhun tuk ruang ah U Khin Maung Tun cu a velh i Hakha sii inn a phan.
Ngakchia kumtlinglo a tlaihhremtu hna cu thih dan pek ding tiah Myanmar ram hmun tampi ah an aupi cuahmah lio a si i atu thilcang kong ah zeitin dah an tawlrel lai ti cu a fiang rih lo.
